Novembro. Mes da Ciencia

Moito cómic

Este ano, as bibliotecas escolares traballaremos especialmente a banda deseñada. Neste vídeo presentámosvos as primeiras adquisicións deste curso.

25 N de cine. Día Internacional da Eliminación da Violencia contra a Muller

A data do 25 de Novembro homenaxea as irmás Mirabal, asasinadas polo réxime ditatorial de Trujillo na República Dominicana tal día de 1960.

A educación é unha arma fundamental para combater a violencia contra as mulleres e a sétima arte, unha boa forma de visibilizar e concienciar sobre este problema social. Por iso, na biblioteca "Ramón Caride" proxectamos o filme "No estás sola, Sara" para o alumnado de 3º e 4º ESO, unha película accesíbel e axeitada para o público adolescente.

Ademais, no cole creamos unhas chapas alusivas á data que todxs lucimos con garbo e que podedes ver no corpo de...

O noso novo Foguetiño de trapo, creado pola profe Conchi Casas. Grazas!

Benestar animal

A semana pasada visitounos Conchi Cibeira para falarlles aos pequerrechos e pequerrechas sobre como alimentar e coidar os aimais domésticos. Acompañábana o coello Arturo, as pitiñas Violeta e Marga e o poliño Xeito.

Que lindiños!

Do libro á pantalla

O alumnado de EI do noso cole asisitiu no día de onte, durante a hora de ler, á proxección da película "¡Cómo mola tu escoba!", baseada no libro homónimo. 

Moi ben o pasaron!

Día das Bibliotecas

O 24 de outubro celebrouse o Día das Bibliotecas. Aproveitando o lema deste ano das bibliotecas escolares de Galicia, engalanamos os expositores móbiles con exemplares de banda deseñada e novela gráfica.

Ademais, agasallamos todo o alumnado que acudiu á "Ramón Caride" durante a semana cos marcapáxinas debuxados por Naiara e Ana  na clase de Expresión Artística en homenaxe ao recordado Ibáñez.

Naiara imaxinou unha escena ao xeito das chambonadas de Pepe Gotera e Otilio; Ana debuxou un Mortadelo pensativo xunta un libro. Moitas grazas, rapazas!

Obradoiro de lectura 2

Como xa vos anunciamos, hoxe comezou o Obradoiro de Lectura dirixido ao alumnado de  4º, 5º e 6º de EP, impartido pola profe Mercedes; e que terá lugar cada penúltimo e último luns de mes. A participación foi alta e parece que se agarda con ilusión o próximo encontro, co compromiso de traeren pensadas unhas lindas rimas poéticas.

A "Ramón Caride" ferve

O pasado 19 de outubro a nosa biblioteca foi un fervedoiro de actividade. 

Alén do cheo habitual durante os recreos, contamos cun laboratorio radiofónico arredor da figura de Vicente Risco, promovido pola súa Fundación e organizado polo EDLG do Cole, en colaboración coa nosa Radio na Biblio e no que participou o alumnado de 4º ESO dende as 9.30 da mañá até preto das 13 horas. Sergio Pascual (Laboratorio de Radio) encargouse de formar, organizar e dirixir o traballo creativo da rapazada. En breve poderedes escoitar os pódcasts resultantes do seu esforzo colectivo.

Durante o primeiro recreo, na sala B da biblioteca deu comezo o obradoiro de lectura dirixido ao alumnado de 1º, 2º e 3º EP, impartido pola profe Carmen. A cativada acolleu con entusiasmo esta sesión e xa está desexando volver gozar dela.

O luns iniciarase o obradoiro de lectura para o alumnado de 4º, 5º e 6º de EP; baixo a batuta da profe Mercedes. Iremos contando...

Radio arredor de Risco

O EDLG e a biblioteca "Ramón Caride" organizan un obradoiro de radio, impartido por Sergio Pascual, arredor da figura de Vicente Risco e alentados pola Fundación que leva o seu nome.

Obradoiro de lectura

Como ben sabedes, este curso a biblioteca do cole abriu as súas portas o día de inicio das clases. Agora traémosvos unha novidade para animar o alumnado de EP na marabillosa, impresionante, magnífica, emocionante... aventura da lectura.

Os obradoiros estarán dinamizados polas mestras Carmen e Mercedes... e haberá sorpresiñas para as persoas participantes.

Graciñas, profes!

Pódcasts do Samaín 2022

Escoitade os relatos de terror e misterio seleccionados no Samaín deste curso, creados e interpretados por alumnado de ESO e editados polo profe de Música, Álvaro Lorenzo Pérez.

Tamén podedes acceder a eles desde Radio Roxar, na web do Cole de Cea.

Inversus crucis

A vinganza de Mariña

O esqueleto e a pantasma

Estramonio

Contamos o noso mundo

O pasado luns, 12 de xuño, contamos coa presenza das narradoras orais Alba de Vales e Raquel Queizás na biblioteca, quen traballaron co alumnado de 1º e 2º de ESO nun laboratorio de lingua.

Enmarcado no seu proxecto global "Cóntame un mundo", a actividade percorre un feixe de concellos galegos para recoller e valorizar a tradición oral como fonte de coñecemento e de comunicación interxeracional.

Tras as achegas traídas polo alumnado das súas casas e aldeas, os equipos elaboraron guións para uns vídeos que logo gravaron no recinto escolar cos móbiles e que editaron posteriormente.

Velaquí as primeiras mostras das pezas creadas pola rapazada, á espera de que nos cheguen todos os traballos.

Nos próximos días, Alba e Raquel organizan o Encontro da Palabra e mais o Roteiro da Memoria no concello de Cea, ao que estades convidadas/os coas vosas familias e do que formará parte unha das nosas alumnas: Diana.

17 de Maio. Día das Letras Galegas

Aquí van algúns dos traballos relacionados coas letras galegas realizados polo noso alumnado:

Coplas a Fernández del Riego, elaboradas na clase de galego polo alumnado de 1º ESO, logo de asistir ao obradoiro de regueifa de Alba María.

Tamén temos o podcast creado polo alumnado de 4º ESO sobre a figura homenaxeada este ano: 

O mesmo alumnado tamén creou dous videopoemas inspirados na obra de Manuel María: A nenez perde a fala e Os cruceiros.

Mascota bautizada!

 A nosa mascota xa ten nome:

Foguetiño

Como sabedes, cada curso elixiu un nome para ela, por votación. As opcións resultantes foron:

Entre esa listaxe, o equipo da biblioteca escolleu, por avultada maioría, o nome de Foguetiño.

O gran troco

Como sabedes, durante este mes a comunidade educativa foi traendo libros que tiña na casa para trocalos por vales que se intercambiarían logo por outros volumes. A iniciativa foi un éxito e contou coa participación de boa parte do alumnado e do profesorado, pero desde a biblioteca queremos destacar especialmente as achegas das nosas compañeiras da limpeza: Yolanda, Montse e Rosa Mary. E, xa de paso, aproveitamos tal escusa para lles agradecer o seu traballo diario, sen o cal o dos demais sería imposíbel ou moi penoso.

Os cruceiros, contados por Arturo

Arturo, amante do noso patrimonio e coñecedor dos cruceiros, veu ao noso cole para compartir connosco os seus saberes. Trátase dunha actividade relacionada co proxecto de EI "PaseArte pola contorna".

Mascota gañadora

O deseño gañador do concurso de mascotas da biblioteca foi creado por Thiago González Viéitez, de 6º de EI. Non digades que non é ben riquiño...

E agora temos que buscarlle un nome de xeito. En cada clase, as titoras e titores organizarán a proposta individual e anónima de nomes, que serán votados posteriormente polo grupo; de forma que de cada aula nos chegará un nome á biblioteca. Entre eses nomes, elixirase o defintivo.

Quedou finalista o traballo de Maio García Piña, de 1º ESO.

Troco de libros

Seguro que na casa tes algún libro xeitoso que xa non pensas volver ler. Esta é a ocasión de trocalo por outro do teu agrado. Alumnxs, profes; animádevos!

Novidades de marzo

Un libriño para botarlle un ollo aos fondos adquiridos de xaneiro a marzo na "Ramón Caride".

21 de Marzo. Día Mundial da Poesía

O alumnado do Cole de Cea creou poemas de seu: unhas veces tomando como molde as estruturas de textos coñecidos (unha forma doada de comezar os pereiriños no mundo lírico) e outras partindo de cero. 

As súas obras fican expostas no corredor próximo á biblioteca. Para apreciardes mellor algunhas das pezas, tendes máis abaixo varias imaxes (non de todos os traballos, porque a participación foi moita).

Laboratorio de Radio "Ramón Caride"

Antonte, 20 de marzo, contamos coa formación para a radio impartida por Sergio Pascual.

Logo dunhas dinámicas de grupo para romper o xeo e mais para aprender a importancia da respiración diafragmática, da escoita activa e do silencio, da sincronización e do traballo en equipo, imprescindíbeis na radio; o alumnado conseguiu elaborar un podcast con música, entrevistas (á profe Mercedes e o profe Pablo) e mesmo pequenas historias inventadas sobre eles.

Formación de radio

O próximo luns, o alumnado inscrito participará na xornada de formación de radio na sala B da biblioteca, polo que as actividades rutineiras dos luns nesas horas, realizaranse na sala A.

8M e Semana da Prensa

Na Semana da Prensa e no 8M realizamos diversas actividades que a seguir expoñemos. 

Parte do alumnado asistiu na biblioteca á proxeción do filme "Os fenómenos", peza que combina humor e drama para afondar no problema da desigualdade de xénero, ao tempo que visibiliza moitos outros conflitos: a burbulla inmobiliaria, a especulación urbanística, a precariedade laboral, a economía somerxida, a xubilación forzada, a paternidade irresponsábel, a familia, o amor tóxico etc.

Por outro lado, a biblioteca recolleu información en todos os ciclos do CPI sobre a presenza de escritoras nos títulos propostos polos diferentes departamentos, para coñecermos a súa porcentaxe con respecto ao total de libros recomendados. Estes foron os resultados: 

Pola súa parte, o equipo de Extraescolares organizou unha actividade, para realizar nas titorías, que conxugaba prensa e 8M. Tras a pescuda nos medios informativos, o alumnado creou un cartel sobre a desigualdade de xénero.

E seguindo coa Semana da Prensa e en colaboración co EDLG, na biblioteca expuxemos unha pequena mostra da revista "Bisbarra", con exemplares cedidos polo veciño e erudito interesado no noso, Evaristo Rodríguez.

Días de Rosalía

Como a nosa Rosalía merece máis dun día, no Cole de Cea levamos traballando con ela todo o mes: creando chapas, facendo pasatempos, pintando pétalos cos seus versos para compor un gran cartel, traballando nun crebacabezas colaborativo, escoitando os seus poemas durante o timbre musical... E como colofón, asisitindo a un concerto de Sergio Tannus e Marta Bravo organizado polo EDL. E esta tarde, na hora de ler, recitaremos algúns dos seus textos.

Deseña a mascota da biblio!

 

Conto Contigo, Alfredo Carral

As familias son unha boa fonte de información para o noso alumnado, que acolle con interese e diversión as súas exposicións. Neste caso, o avó de Amaya e Jorge veu visitarnos o 3 de febreiro para compartir coa cativada o seu coñecemento sobre un elemento do noso acervo cultural: os cabaceiros.

Grazas, Alfredo!

#Candeloria

Pola Candeloria, o alumnado do Cole de Cea creou unha paxarada chea de refráns e versos de amor... 

E tal e como foi o día, parece que aínda temos inverno para ben tempo.

Día da Ilustración 2023

 
`

Unha pequena mostra dos marabillosos libros ilustrados 

que atoparás na biblioteca...

Novidades de xaneiro

Fórmate no uso da plataforma Elbe-2

Como sabes, desde a nosa biblioteca contas cun acceso á plataforma de lectura e préstamos dixitais Elbe-2. Agora podes formarte en liña para utilizala mellor e tirarlle todo o partido. Anímate a participar nas sesións formativas que nos ofrecen!

Elbe2 Itinerario Galicia 2º Trimestre 2022 23

Últimas adquisicións

Tarxetas de Nadal

Se estás en Educación Primaria, escolle a túa tarxeta da biblioteca e engádelle un texto de bos desexos dunhas 20 palabras inspirado na ilustración. Tes variedade de modelos para escolleres.

Se estudas Secundaria, busca ti unha ilustración de xeito nalgún libro da biblioteca e achégate ao posto de xestión para que cha imprimamos. Logo escribe un texto de bos desexos dunhas 40 palabras nela e poderás entregarlla a quen quixeres.

O alumnado de Infantil fará o seu debuxo na tarxeta que lle proporcionará a mestra.

Anímate a participar!

Tamén "Conto Contigo"

Escribir o medo

Sen tempo non foi, pero aquí tendes as creacións gañadoras dos concursos de Samaín organizados polo EDL en colaboración coa biblioteca.

EI: debuxo

EP: banda deseñada

ESO: relato e microrrelato