luns, 28 de outubro de 2019

Algunhas fotos máis do #díadabiblioteca

Aquí tedes algunhas fotos máis para ampliar o retrato gráfico do que foi o Día das Bibliotecas no cole de Cea.

O xoves 24 de Outubro foi unha xornada estupenda para o Cole de Cea coa celebración do #díadaabibliotecas. As pequenas do cole enredaron cos contos de Celtia Figueiras. E o alumnado da ESO recibiu unha auténtica lección vital e de superación por parte de Laura Novelle , dentro do marco do que é unha biblioteca inclusiva. Moitas grazas por acompañarnos e #felizdíadasbibliotecas 📚

luns, 21 de outubro de 2019

Pregón para conmemorar o #díadabiblioteca 2019


                                                   “A SEN CONTO”


Non quería ser princesa, non quería ser liberada polo 
príncipe azul. Tampouco que o bico dun Príncipe a 
devolvese á vida; nin que a salvase da explotación 
infantil,non quería esconderse na casa dos sete ananiños 
e ser a súa criada ata que un príncipe a viñese rescatar. 
Non era capaz de renunciar á súa voz polo amor dun mozo; 
nin esperaba que san Xurxo a salvase do dragón. 
Nobres princesas condenadas a durmir ou ao silencio, 
por orde dunha madrasta, dun pai ou dunha fada boa.

E puxo os seus zapatos vermellos e fuxiu do seu conto, 
correu e correu buscando refuxio ata converterse nunha 
sen conto.
Era unha sen libro, unha sen papeis,non a querían en ningures.

Nunha casca de noz navegou polo Mar das Letras, e naufragou. 
Nadaba contra a corrente, fortes ondas de frases afogábana, 
e cando se deu por vencida e se abandonou á súa sorte, 
de súpeto salvouna a capitá Pippi Långstrump, unha nena libre,
xenerosa, que nunca se aburría, que se atrevía a cuestionar o
razoamento dos adultos. Acompañada por Matilda, navegaban polo 
mar das letras para rescatar todos aqueles personaxes que se 
aventuraban a cruzar o mar buscando un conto mellor. Heroínas
con forte sentido da xustiza e do deber de protexer os máis 
débiles.

Finalmente, despois de moitos atrancos, chegaron a porto 
seguro,o Porto da Biblioteca, o Paraíso do que lle falara Borges:
un lugar cheo de tesouros afundidos, como lle dixera
Virginia Woolf; unha nave espacial que a levaría aos recunchos 
máis afastados do universo; unha máquina do tempo que a 
transportaría ao pasado máis remoto e ao futuro más afastado; 
unha saída a unha vida mellor, máis feliz e máis útil, 
como lle explicara Isaac Asimov. Un lugar onde non necesitaba 
ser princesa para ser a protagonista de todos os contos.

Longa vida ás bibliotecas, refuxio de todas, tamén das sen conto, 
das sen libro, das sen papeis, das nenas que non queren ser 
princesas e dos nenos que non queren ser heroes. Longa vida 
aos bibliotecarios e bibliotecarias, gardiáns do Paraíso, 
de máquinas do tempo e de grandes tesouros como son os libros.


Autora: Gemma Pascual

Tradución: Héctor Cajaraville

venres, 18 de outubro de 2019

Orixe da celebración do #díadabiblioteca no 24 de Outubro .








Por que se celebra o 



#24deOutubro 


o



#díadabiblioteca?


Dende o ano 1997, o 24 de Outubro foi escolleito coma o Día da Biblioteca. A proposta xurdiu da Asociación Española de Amigos do Libro Infantil e Xuvenil, apoiada polo Ministerio de Cultura, en lembranza da destrución da Biblioteca de Sarajevo, incendiada no ano 1992 durante a Guerra dos Balcáns.

A iniciativa naceu para trasladar á opinión pública, a importancia da biblioteca como lugar de encontro dos lectores e lectoras de todas as idades coa cultura, e tamén como unha ferramenta de mellora da formación e a convivencia humana.

Con elo, preténdese educadar a nen@s e maiores sobre os valores da lectura e cultura que se pode atopar nunha biblioteca e salientar a labor das bibliotecas como centros de integración e socialización que demostran decote que os libros están ao alcance de todas as persoas que teñan a vontade de se mergullar nas súas páxinas.

Fonte: libreriaolacacia.com






  O músico bosnioherzegovino Vedran Smailović tocando o seu violonchelo entre os cascallos da Biblioteca de Saraxevo, como acto de resistencia pacífica e para realizar unha chamada de atención ao resto do mundo.


Fonte: reddebibliotecas.org




venres, 11 de outubro de 2019

O alumnado de Educación Infantil e Primaria, celebrará o #díadasbibliotecas con Celtia Figuieiras, o vindeiro 24 de Outubro.

O alumnado de Infantil e Primaria do Cole de Cea tamén celebrará o #DíadasBibliotecas. E farao da man de #CeltiaeRosi con Celtia Figuerias.

Rosi, unha nena á que lle encantan a música e máis os contos, descobre a través do artista que vai dar un concerto ao seu colexio, que os contos se poden cantar!

Celtia e Rosi contan e cantan as historias de "Cantamos?"
de Luis Vallecillo (editado por Guindastre Edicións ) das cales
Celtia é autora e narradora.

Será o xoves 24 de outubro na Biblioteca Ramón Caride do centro.

martes, 8 de outubro de 2019

O vindeiro 24 de Outubro para celebrar o #díadasbibliotecas recibiremos a Laura Novelle, autora do libro "39 escalones con vistas al mar"

O cole de Cea celebra o #DíadasBibliotecas coa visita da escritora
Laura Novelle autora do libro “39 escalones con vistas al mar”.

A partir de experiencias vitais e profesionais da autora explicará como é o traballo nunha biblioteca e o xeito en que esta pode axudar á integración social da discapacidade.

O xoves 24 de outubro na Biblioteca Ramón Caride do centro para o alumnado da ESO.

Vealquí tedes un enlace ao seu blog:https://docendodiscitur.blog/



Recomendación lectora de Saleta