Cabazas históricas do cole de Cea

Moitísimas grazas ás familias pola vosa implicación, polo tempo e polo enorme esforzo que sabemos que hai detrás de cada cabaza.

Premede no vídeo e descubrídeas todas!

Xa está listo o noso Espazo Creativo!

 Na biblioteca do cole de Cea preparamos un recuncho cheo de cores, materiais e posibilidades para deixar voar a imaxinación.

Agardamos que este novo espazo esperte a curiosidade de pequenos e maiores e que se converta nun lugar cheo de ideas e creatividade.

MANS Á OBRA, ARTISTAS!

Xa estamos a preparar o Samaín na biblioteca!

 Na Biblioteca Ramón Caride estamos a preparar un Samaín terrorificamente divertido!  

Mural colaborativo: elaboramos un mural relacionado co noso PDI O cole de Cea conta.

Retos de Kappla: poñemos a proba a nosa creatividade e o traballo en equipo.

Taller de grilandas pantasmagóricas: reutilizamos materiais dos expurgos da biblioteca para crear decoración arrepiante!

Exposición de cabazas.

Animámosvos a participar elaborando as vosas cabazas para encher a exposición de propostas orixinais e arrepiantes. A continuación, deixámosvos as indicacións para participar.

Contamos convosco!

Formación de usuarios e usuarias.

 Esta semana estivemos coñecendo a fondo a biblioteca!

Aprendemos onde está cada sección, que significan os gomets de cores, como nos axuda o tello a atopar os libros e repasamos as normas da biblioteca.

Agora xa sabemos un pouco máis sobre como movernos pola biblio e como atopar o libro que buscamos.

Despois de moito traballo e moita ilusión, a Biblioteca Ramón Caride está lista para abrir as súas portas o vindeiro luns 5 de outubro.

Agardámosvos!

CORREO DA BIBLIOTECA

 O alumnado do Cole de Cea atopouse cunha sorpresa especial nas súas aulas: unhas cartas da Biblioteca enviadas por Foguetiño.

Nelas, Foguetiño explicaba o papel da Biblioteca no proxecto e presentaba a etapa histórica que lle corresponde traballar a cada ciclo:

• Educación Infantil → Prehistoria
• 1º ciclo de Primaria → Idade Antiga
• 2º ciclo de Primaria → Idade Media
• 3º ciclo de Primaria → Idade Moderna
• ESO → Idade Contemporánea

Agora toca investigar sobre cada época para comezar a decorar o mural e as aulas.

Na Biblioteca xa temos preparada unha selección de libros e materiais para axudarnos nesta primeira misión.

O COLE DE CEA CONTA…

 Xa estamos de volta!

A biblioteca Ramón Caride ponse en marcha cunha nova aventura: o noso PDI “O cole de Cea conta”.

Este curso faremos unha viaxe no tempo, guiados por Foguetiño, para investigar como a humanidade contou as súas historias, transmitiu as súas ideas e expresou as súas emocións ao longo das diferentes épocas. 

Desde a Prehistoria ata a actualidade, iremos descubrindo diferentes formas de contar, crear e comunicar.

Xa temos preparado un gran mural, que iremos completando entre todas e todos ao longo desta viaxe.

Pouco a pouco iremos desvelando máis pistas…

A aventura comeza!

Últimas novidades da biblioteca... e recomendacións para o verán!

O curso está chegando á súa fin e, antes de despedirnos, queremos compartir convosco as últimas novidades que chegaron á biblioteca.

Novas historias, cómics, álbums ilustrados e libros cheos de aventuras agárdanvos nos nosos andeis. Ademais, deixámosvos algunhas recomendacións lectoras para que este verán sigades gozando da lectura.

Xornadas de convivencia para o novo alumnado

 A nosa biblioteca acolleu unha actividade moi especial dentro das xornadas de convivencia co alumnado que se incorporará ao centro o vindeiro curso.

Contamos coa visita do Mago Abel, que ofreceu un espectáculo para o alumnado de 1º a 3º de Educación Primaria e, posteriormente, outro para todo o alumnado de Educación Infantil.

Unha mañá chea de maxia, risas e ilusión que nos permitiu compartir un fermoso momento de convivencia e dar a benvida aos futuros compañeiros e compañeiras. 

CON VOZ DE LIBROS!

Como o curso vai chegando ao seu fin e a biblioteca comeza a preparar o peche deste ano, quixemos dedicar un programa moi especial aos seus usuarios máis fieis.

Por iso nace “Con voz de libros”, un espazo de radio no que entrevistamos aos catro alumnos e alumnas

que máis libros levaron en préstamo ao longo do curso. Falamos con eles das súas lecturas favositas,

dos libros que máis lles gustaron e das recomendacións que lle farían ao resto dos compañeiros 

e compañeiras.

Dálle ao play e escoita as voces que máis páxinas moveron na nosa biblioteca este ano!

CON VOZ DE LIBROS

SAÚDE BUCODENTAL

 Ao longo deste curso, o noso alumnado participou nas xornadas do programa de Saúde Bucodental en Atención Primaria, unha iniciativa dirixida a promover hábitos saudables de hixiene e coidado da boca desde as primeiras idades.

As sesións, adaptadas ás distintas etapas educativas, permitiron que o alumnado aprendese a

importancia dun correcto cepillado, dunha alimentación saudable e das revisións periódicas para

previr problemas bucodentais.

Agradecemos ao persoal sanitario a súa colaboración e o seu labor divulgativo, axudando a 

fomentar hábitos saudables entre o alumnado. 

O SON DO CHIFRE

 Dentro do proxecto Radio na Biblio, participamos no concurso “O vello dos contos" un

 certame de podcast que promove a lingua galega a través da oralidade e das novas

 tecnoloxías.

O podcast presentado leva por título “O son do chifre”.

Neste traballo, o profe Pablo Nogueira recreou a historia de cando un famoso musicólogo

 

recolleu nunha aldea de Luintra, nos anos cincuenta, unha melodía asubiada por un afiador.

Gravouna e anos despois sería empregada por Miles Davis para incorporala nunha peza dun

 

dun dos seus discos máis celebrados. Na canción “The Pan Piper”, gravada no disco 

“Sketches from Spain”, aparecen as notas musicais bulidas do chifre daquel afiador 

galego interpretando a “Alborada de Vigo”.

Grazas ao profe Pablo Nogueira pola súa dedicación e ao alumnado participante polo 

gran traballo realizado!!

AUDIO " O SON DO CHIFRE":

https://drive.google.com/file/d/14Kh3VdGLhne2YJwh2jjQqgDuGX97UlXa/view?usp=sharing

LETRAS GALEGAS

Na nosa biblioteca celebramos con moita ilusión o Día das Letras Galegas coa nosa marabillosa festa do SERÁN, unha xornada chea de música, tradición  e convivencia para compartir e poñer en valor a nosa lingua e a nosa cultura.

Queremos aproveitar esta celebración para agradecer o traballo  de moitas alumnas do centro que, ao longo de todo o curso, colaboraron nos recreos na elaboración dos murais e decoracións das diferentes festividades do cole. 

Grazas á súa creatividade e esforzo, os corredores e espazos do centro enchéronse de cor e vida en cada celebración.

Seguimos facendo escola e comunidade! 

FOGUETIÑO A TRAVÉS DO DESEÑO

 Seguindo o lema deste curso da Rede de Bibliotecas Escolares de Galicia, “Desescribir.

Biblioteca escolar + Deseño = Viaxe á creatividade”, o alumnado de 4º de primaria

embarcouse nunha proposta moi especial.

Nesta ocasión, a nosa querida mascota, Foguetiño, converteuse na protagonista 

dunha viaxe moi particular: un percorrido pola creatividade a través do tempo. 

O alumnado traballou ao redor de diferentes estilos artísticos, O alumnado traballou ao 

redor de diferentes estilos artísticos, recreando así unha pequena mostra inspirada

en distintas épocas e formas de expresión.

O resultado foi un mural cheo de cor, imaxinación e personalidade, no que cada 

Foguetiño conta unha historia diferente.

SEMANA DO DÍA DO LIBRO

 Hai semanas que pasan sen máis… e outras que deixan pegada. A do Día do Libro foi desas: biblioteca con vida, libros en movemento e ganas de ler por todas partes.

O alumnado máis pequeno mergullouse nas sesións de ocntacontos. Escoitamos "A noite das  mudanzas" da man de Pichel, "Como mola tu escoba", contado por Paula e a profe Ana trouxo "El muro",  un conto que fala da xenofobia dun xeito claro e que tamén nos fixo pensar.

En Primaria, de 3º a 6º, a "amizade invisible lectora" funcionou de marabilla: libros 

escollidos con intención, intriga ata o final… e máis dun intentando descubrir o seu

“amigo” antes de tempo.

En Secundaria, a Semana Literaria converteu as aulas nun espazo para ler con 

calma, pensar mellor e entender máis. Textos distintos, miradas diferentes, pero

un mesmo  fío: a lectura como ferramenta.

E para pechar, o profesorado tamén se sumou cun "amigo invisible lector", regalámonos

libros e recomendacións, porque compratir lecturas sempre suma.

A nosa Árbore da Igualdade medra polo 8M.

Con motivo do 8M preparamos unha exposición de libros sobre mulleres inspiradoras . A partir destas lecturas, cada alumno e alumna escolleu unha muller e elaborou unha pequena ficha cos datos máis importantes da súa vida e do seu legado.

O alumnado de Infantil participou doutra maneira moi especial: debuxaron ou escribiron sobre as mulleres máis importantes das súas vidas.

Con todas estas tarxetas construímos entre todas e todos a nosa Árbore da Igualdade, que medra para lembrarnos algo importante: moitas mulleres abriron camiño, pero a loita pola igualdade aínda continúa.

TODAS E TODOS CONTAMOS

 Onte celebramos no cole a actividade “Todas e todos contamos”, unha xornada chea de diversión 

da man de monitores e monitoras con diversidade funcional.

En Infantil gozaron dun contacontos sobre os distintos modelos familiares e dun obradoiro no 

que crearon  as súas propias propostas cheas de imaxinación.

De 1º a 4º rimos cunha obra de teatro que nos deixou algo ben claro: as tarefas da casa repártense 

e fanse en equipo.

E en 5º e 6º deixaron voar a creatividade facendo polbos xigantes de globoflexia.

Moitas grazas polos talleres e por facernos pasar unha mañá tan especial!

A ÁRBORE DA MIÑA VIDA