TODAS E TODOS CONTAMOS

 Onte celebramos no cole a actividade “Todas e todos contamos”, unha xornada chea de diversión 

da man de monitores e monitoras con diversidade funcional.

En Infantil gozaron dun contacontos sobre os distintos modelos familiares e dun obradoiro

no que crearon  as súas propias propostas cheas de imaxinación.

De 1º a 4º rimos cunha obra de teatro que nos deixou algo ben claro: as tarefas da casa repártense 

e fanse en equipo.

E en 5º e 6º deixaron voar a creatividade facendo polbos xigantes de globoflexia.

Moitas grazas polos talleres e por facernos pasar unha mañá tan especial!

A ÁRBORE DA MIÑA VIDA

 

RETOS SEMANAIS NA BIBLIO!!

Comezamos un reto semanal co xogo Kapla! Cada semana publicaremos unha imaxe que teredes que intentar reproducir empregando as pezas do xogo.

Este xogo témolo na biblioteca grazas a Polos Creativos, que nolo cedeu para poñer a proba a nosa creatividade e paciencia!

Animádevos a participar e… mans á obra!

A nosa biblio segue medrando!

Grazas aos fondos do PLAMBE, renovamos o mobiliario da Sala B con catro mesas abatibles e cadeiras apilables. 

Así gañamos un espazo máis versátil, preparado para diferentes actividades segundo o que precisemos en cada momento. 

Agora só queda estreala… e darlle moito uso, que para iso está!

NOVIDADES 2º TRIMESTRE

A biblio vén cargadiña de novidades para o 2º trimestre… libros novos que están desexando saír de paseo nas vosas mochilas!

Mañá celebramos a Candeloria, a festa da voda dos paxaros, e na biblioteca temos un detalliño para ti...

 

Día Escolar da Non violencia e a Paz

 Con motivo do Día da Paz e enmarcada dentro do noso proxecto de centro, no cole levamos a cabo unha actividade moi especial: a creación da Árbore da Paz.

Unha árbore simbólica formada polas mans de todo o alumnado, cheas de palabras e mensaxes relacionadas coa paz.

A actividade completouse co visionado da película O bosque animado, que nos axudou a reflexionar sobre a convivencia e o respecto polos demais e polo entorno.

Radio Roxar en acción!!

Onte tivemos a sorte de recibir na nosa biblioteca a Gabriel Paz Otero, técnico profesional de imaxe e son e especialista en creación audiovisual, con ampla experiencia na produción técnica de programas de radio. O obradoiro estivo dirixido ao alumnado de 5º de primaria, mentres que a formación para 2º da ESO queda posposta ata o martes, debido á suspensión de clases polo temporal.

Durante a primeira parte, o alumnado coñeceu os aspectos técnicos dun programa de radio, e despois deseñaron o seu propio programa, preparando a escaleta e o contido, e creando eles mesmos os efectos de son. Finalmente, subiron á radio para gravar unha simulación en directo na nosa emisora Radio Roxar, vivindo de primeira man a experiencia de ser locutores por un día.

Cando teñamos a producción maquetada, subiremos o programa completo ao blog para que todas poidades escoitalo.

VISITA DO APALPADOR!

Dende as montañas do Courel chegou o Apalpador á biblioteca do cole, onde pasaron os nenos e nenas de Infantil e Primaria para coñecelo e contarlle os seus desexos. 

A visita estivo moi ligada ao noso proxecto “Amamos os nosos bosques!”, lembrándonos a importancia de coidar a natureza e deixándonos unha mensaxe clara: querer os bosques é querernos a nós 💚

A radio visitou a nosa biblioteca!

O xoves pasado visitounos o programa de radio Fala que Fala. Pasámolo xenial con xogos, entrevistas e moita participación do alumnado.

Unha experiencia moi positiva para a dinamización do galego.

Encantadas de participar!

BIBLIO TROCO SOLIDARIO

Doa 1 kg de alimentos non perecedoiros e leva un libro da biblioteca. Pequenos xestos, grandes cambios. 💛

Día das Múltiples Capacidades na Biblioteca

Hoxe, 3 DE DECEMBRO, o alumnado de Infantil e Primaria pasou pola biblioteca para visibilizar o Día das Múltiples Capacidades.

Primeiro, escoitamos o conto “Por 4 esquinitas de nada”, que nos fixo entender que o importantenon é encaixar, senón adaptar o mundo para que todas as persoas poidan participar.

Entre todos e todas fixemos tamén unha exposición de bolboretas, cada unha destacando unha

capacidade diferente. Un xeito visual e sinxelo de lembrar que todos temos algo que achegar.

Para completar a actividade, preparamos unha exposición de libros relacionados co tema, 

dispoñibles para quen queira seguir investigando e aprendendo.

Unha xornada para mirar a diversidade con naturalidade e respecto.

A BIBLIOTECA ABRE A PORTA VIOLETA

No 25N non celebramos nada. É un día para lembrar que aínda queda moito por facer na loita contra a violencia de xénero. Na nosa biblioteca escolar falamos co alumnado a partir de 2º de Primaria sobre a exposición que temos esta semana: unha pequena mostra de mulleres asasinadas só en Galicia, unha realidade dura que non podemos ignorar.

Despois, reflexionamos e debatemos a través de preguntas sobre por que seguen ocurrendo estas 

situacións e que podemos facer entre todas e todos para cambialas. 

Para pechar a actividade, cantamos xuntas "A Porta Violeta" de Tanxugueiras e Rozalén, un himno que 

nos lembra que sempre hai un camiño cara á liberdade e ao respecto.

BUSCA DAS PANTASMIÑAS BRINCADEIRAS

Queremos dar as grazas a Vanessa, mamá de Alexandra (6ª EI) e Gael (5ªEI), polo seu fermoso agasallo: unhas pantasmas feitas por ela mesma que encheron de misterio a nosa biblioteca.

Pasámolo xenial!!

Cabazas con moito conto!

Grazas, familias, por poñer tanto cariño, creatividade e humor nas vosas cabazas lectoras. 

Tivemos de todo: cabazas con lentes, cabazas con medo, cabazas que semellan saídas dun conto... e mesmo algunha que merecería un contrato editorial!

Noraboa a todos e todas!

24 DE OUTUBRO: DÍA DAS BIBLIOTECAS

Mañá, 24 de outubro, celebramos o Día das Bibliotecas, esta data escolleuse en lembranza da destrución da Biblioteca Nacional de Sarajevo en 1992, un recordatorio de que os libros e a cultura son tesouros que debemos protexer.

Para festexalo, poñemos en marcha as nosas mochilas viaxeiras!

Cada mochila contén unha pequena selección de libros, revistas e materiais para gozar en familia. Irán viaxando polas casas do alumnado para que todos poidamos compartir o pracer da lectura máis alá da escola.

BUUUUUUU!!! NOVIDADES E CLÁSICOS DE SAMAÍN

O Samaín xa está aquí e a biblioteca énchese de misterio! Preparamos unha selección de lecturas arrepiantes con novas adquisicións e tamén cos nosos clásicos máis terroríficos. 

Atréveste a levalos en préstamo?!

EXPOSICIÓN CABAZAS LECTORAS

Outubro chegou e trae consigo libros, cabazas e moita diversión! 🎃

No cole de Cea imos celebrar a Exposición de Cabazas Lectoras, onde os vosos personaxes favoritos cobrarán vida de xeito creativo. Podedes decorar a vosa cabaza inspirándovos nun libro, unha historia ou un personaxe que vos guste.

Lembrade: as cabazas non se poden baleirar e deben vir acompañadas dunha ficha co título, o autor/a e unha frase que explique a relación co libro.

Preparade pinceis, cores e moita ilusión, e sorprendédenos coas vosas creacións!

MALETA VIAXEIRA

Este mes temos unha pasaxeira moi especial no colexio: a maleta viaxeira da Rede de Bibliotecas Escolares de Galicia! Vén cargadiña de álbums de banda deseñada que farán parada en todas as clases de Primaria. Cada aula terá uns días para explorar as súas aventuras e deixarse levar polo mundo do cómic. 

Moitas grazas por este recurso que enriquece o noso proxecto lector!