8M e Semana da Prensa

Na Semana da Prensa e no 8M realizamos diversas actividades que a seguir expoñemos. 

Parte do alumnado asistiu na biblioteca á proxeción do filme "Os fenómenos", peza que combina humor e drama para afondar no problema da desigualdade de xénero, ao tempo que visibiliza moitos outros conflitos: a burbulla inmobiliaria, a especulación urbanística, a precariedade laboral, a economía somerxida, a xubilación forzada, a paternidade irresponsábel, a familia, o amor tóxico etc.

Por outro lado, a biblioteca recolleu información en todos os ciclos do CPI sobre a presenza de escritoras nos títulos propostos polos diferentes departamentos, para coñecermos a súa porcentaxe con respecto ao total de libros recomendados. Estes foron os resultados: 

Pola súa parte, o equipo de Extraescolares organizou unha actividade, para realizar nas titorías, que conxugaba prensa e 8M. Tras a pescuda nos medios informativos, o alumnado creou un cartel sobre a desigualdade de xénero.

E seguindo coa Semana da Prensa e en colaboración co EDLG, na biblioteca expuxemos unha pequena mostra da revista "Bisbarra", con exemplares cedidos polo veciño e erudito interesado no noso, Evaristo Rodríguez.

Días de Rosalía

Como a nosa Rosalía merece máis dun día, no Cole de Cea levamos traballando con ela todo o mes: creando chapas, facendo pasatempos, pintando pétalos cos seus versos para compor un gran cartel, traballando nun crebacabezas colaborativo, escoitando os seus poemas durante o timbre musical... E como colofón, asisitindo a un concerto de Sergio Tannus e Marta Bravo organizado polo EDL. E esta tarde, na hora de ler, recitaremos algúns dos seus textos.

Deseña a mascota da biblio!

 

Conto Contigo, Alfredo Carral

As familias son unha boa fonte de información para o noso alumnado, que acolle con interese e diversión as súas exposicións. Neste caso, o avó de Amaya e Jorge veu visitarnos o 3 de febreiro para compartir coa cativada o seu coñecemento sobre un elemento do noso acervo cultural: os cabaceiros.

Grazas, Alfredo!

#Candeloria

Pola Candeloria, o alumnado do Cole de Cea creou unha paxarada chea de refráns e versos de amor... 

E tal e como foi o día, parece que aínda temos inverno para ben tempo.

Día da Ilustración 2023

 
`

Unha pequena mostra dos marabillosos libros ilustrados 

que atoparás na biblioteca...

Novidades de xaneiro

Fórmate no uso da plataforma Elbe-2

Como sabes, desde a nosa biblioteca contas cun acceso á plataforma de lectura e préstamos dixitais Elbe-2. Agora podes formarte en liña para utilizala mellor e tirarlle todo o partido. Anímate a participar nas sesións formativas que nos ofrecen!

Elbe2 Itinerario Galicia 2º Trimestre 2022 23

Últimas adquisicións

Tarxetas de Nadal

Se estás en Educación Primaria, escolle a túa tarxeta da biblioteca e engádelle un texto de bos desexos dunhas 20 palabras inspirado na ilustración. Tes variedade de modelos para escolleres.

Se estudas Secundaria, busca ti unha ilustración de xeito nalgún libro da biblioteca e achégate ao posto de xestión para que cha imprimamos. Logo escribe un texto de bos desexos dunhas 40 palabras nela e poderás entregarlla a quen quixeres.

O alumnado de Infantil fará o seu debuxo na tarxeta que lle proporcionará a mestra.

Anímate a participar!

Tamén "Conto Contigo"

Escribir o medo

Sen tempo non foi, pero aquí tendes as creacións gañadoras dos concursos de Samaín organizados polo EDL en colaboración coa biblioteca.

EI: debuxo

EP: banda deseñada

ESO: relato e microrrelato

Preparando o 25N

O vindeiro venres é o Día Internacional da Eliminación da Violencia contra a Muller. No seguinte vídeo explícannos por que o 25N e non outro día calquera...

Ligazón a Youtube

Marina Marroquí, supervivente da violencia de xénero, explícanos o ciclo da violencia de xénero; e como, o maltrato físico representa o fracaso do propio sistema de violencia contra a muller que, case nunca, precisa de chegar a ese extremo para cumprirse.

Se chegaches ata aquí, xa sabes máis sobre a violencia contra as mulleres e as súas múltiplas caras. E aquí vai a proposta da biblioteca "Ramón Caride" para esta semana: redacta un microtexto (se pode ser orixinal, mellor; se non, podes reproducir algunha cita relacionada co tema) e tráenolo á biblioteca para escribírelo, co nome da persoa autora, nunha tarxeta que che proporcionaremos. Estas tarxetas serán expostas o 25N. Na imaxe inferior tendes un exemplo.

Para a cativada máis pequerrecha, este luns e o martes pola tarde, a ANPA traerá á biblioteca contacontos relacionados co tema.

E este venres, na sala B, proxectaremos o filme "Te doy mis ojos", de Icíar Bollaín, para o alumnado de 3º e 4º ESO.

A ciencia é o noso

Neste mes da ciencia, unimos o lema das bibliotecas escolares deste ano (Escribir a biblioteca escolar), co proxecto do centro "O noso" para alumar un traballo interdiciplinar realizado polo alumnado de 6º EP a finais do curso pasado. 

A rapazada investigou en libros e na Rede sobre o mundo vexetal, fotografou os exemplares do recinto escolar, redactou os textos, procurou poemas relacionados con cada imaxe...

Velaquí tendes o resultado.

Como mola pasar mediño!

Os días 27 e 28 de outubro, co gallo da celebración do Samaín, o alumnado de 1º ESO leu dramatizadamente un conto de "medo" aos máis pequenos do cole, dentro do proxecto Conto Contigo e baixo a dirección da profe Ana.

O libro escollido foi "¡Como me mola tu escoba!", escrito por Julia Donaldson e ilustrado por Axel Scheffler. Trátase dunha obra moi famosa, premiada en varias ocasións, traducida a moitísimos idiomas e mesmo adaptada ao cinema.

O libro narra as aventuras dunha simpática bruxa que vai perdendo cousas mentres voa, pero que as recupera a medida que vai gañando amigos. Unha historia rimada, divertida e, sobre todo, chea de valores, coa que grandes e pequenos o pasaron "de medo" nun día tan sinalado.

Proximamente publicaremos o resultado dos concursos literarios do Samaín organizados polo EDL e a Biblioteca. Estade atentxs!

Escribimos nas follas

Está o chan inzado de follas outonizas. Elas poden ser un bo soporte para microtextos literarios. Anímate a participar nesta actividade para o Día das Bibliotecas e verás o teu traballo exposto o 24 de Outubro.

17 de Outubro. Día das Escritoras

Co gallo do seu día grande, 17 de Outubro este ano (todas as xornadas lles pertencen), amosamos unha pequena mostra do traballo dalgunhas das autoras que habitan as nosas salas no corredor que conduce á biblioteca.

A que campan ben?

In-formamos

Dentro das actividades da biblioteca "Ramón Caride" do inicio do curso, destacamos hoxe as relacionadas coa formación das persoas usuarias.

A profe Mercedes encargouse de impartir as xornadas formativas para o alumnado de EP, curso por curso.

Alén diso, editamos guías de usuarixs en formato díptico e tríptico para cada sala da biblioteca.

Arrincamos!

Logo de pór a punto a biblio: estreando piso, postos de xestión e ordenadores portátiles; impartindo charlas formativas, creando guías de uso, actualizando as mochilas viaxeiras e reorganizando os fondos.... arrincamos! 

Podes visitarnos nos recreos, á parte das horas de lectura programadas e doutras clases nas que participas desde o inicio do curso. Temos xogos, libros, pelis... todo o que xa sabes. Agardámoste!

Grandes lectores

O venres pasado, a cativada de Educación Infantil reuniuse no seu recuncho da biblioteca para presumir de pasaporte lector. Traballo completado por este curso.

Bravo, superlectores!

Florencio Delgado Gurriarán

O alumnado de 4º ESO participou na Semana Escolar das Letras Galegas organizada pola Deputación de Ourense. 

Recibiron cadanseu libro "Florencio Delgado Gurriarán fronte á exaltación da natureza", de Perozo, que leron e analizaron na clase. Sintetizaron a información nun cartel que completou o podcast que gravaran nun traballo previo.

Florencio Delgado Gurriarán

Tes ao día o pasaporte?

Revisaches o teu pasaporte lector? Uxía xa o fixo e conseguiu parte do seu premio ao completar a metade das lecturas necesarias. Bótalle un ollo e ven polo teu agasallo, se é o caso.

Moi ben, Uxía!

Videopoema de 3º ESO

Co esquema estrutural de Longa noite de pedra, o alumnado de 3º ESO inventou os seus propios textos. Algúns eran tristes, outros ledos. Graváronse recitando, engadíronlles unhas imaxes aos audios, unha musiquiña e... velaí tendes un videopoema ben xeitoso. E todo cun móbil. A tecnoloxía, ben empregada, dá moito xogo.

,

Ben feito, rapazas!

Dicímoscho nós

O alumnado de 6º EP non para! Desde a biblioteca escolar creou unha serie de vídeos para que non nos despistemos con algunhas palabriñas. Grazas aos dicionarios, desbotan as interferencias lingüísticas e así nolo fan saber. Para que non nos confundamos. 

Aí vos vai a primeira serie. Atendede!

Bravísim@s!

Como facer un maio pequeniño

Como o prometido é débeda, aquí tendes o vídeo instrutivo no que alumnado de 3º ESO amosa como construír un pequeno maio a partir de material de refugallo e uns feixiños de vexetación. Unha boa forma de gozarmos dun maio miúdo dentro da casa, para festexar a entrada da primavera e celebrar a fertilidade.

Esta tarefa foi realizada para a clase de Lingua e literatura castelás coa profe Ana.

Moi bo traballo, rapazas!

Vai chegando o maio

Vaise achegando o VI Serán do Cole de Cea e con el, o festexo das nosas letras. Entre tanto, o alumnado de 3º ESO, coa profe Ana, artellou un maio pequeniño na biblioteca, adianto do que se erguerá o día 16 coa colaboración de todo o cole.

Presentámosvolo aquí, ben acompañado dun poema de Florencio Delgado Gurriarán. Proximamente teredes ao voso dispor o vídeo titorial co proceso de construción deste maio tan feituco.

Graciñas, profe Ana e 3º ESO!

Día do Libro no Cole de Cea

Co gallo do Día do Libro, a biblioteca agasallou os membros do alumnado do Cole de Cea con cadanseu libro.

Pola súa parte, a rapazada contribuíu ao embelecemento da escola achegando libriños de creación artesá, con textos literarios ou científicos orixinais e mais con marcapáxinas ben fermosos.

Moitas grazas, artistas!

Crea o teu libriño

Como sabedes, o 23 de abril é o Día do Libro. Para celebralo, haberá algunha sorpresiña da biblioteca. Pero antes diso, podes colaborar coa nosa exposición de libriños e marcapáxinas en forma de bolboreta. 

Candela amósache neste vídeo como elaborar o teu libriño, no que poderás incluír calquera texto de creación propia. Podes botar man de poemas, microrrelatos ou traballos de non ficción feitos na aula; e ilustralo coa técnica que prefiras.

Graciñas, Candela!

Crea a túa bolboreta marcapáxinas

Aprende a facer con Maio un marcapáxinas fabuloso. Entretente e crea un obxecto útil e lindo cun simple papel. 

Logo, podes completar o deseño con rotulador, como na imaxe inferior ou como a imaxinación che dite.

Así o fixo o alumnado do obradoiro de papiroflexia impartido polo profe Maio, de 6º EP, ao que tamén asistiu a profe Mercedes. Atopádela na foto?

Acceso a ELBE2

Se es profe ou alumno de ensino secundario no Cole de Cea, xa podes acceder á plataforma de lectura e préstamo de libros ELBE2, premendo na ligazón da parte baixa desta páxina. Podes consultar as túas claves de acceso na biblioteca e comezar a ler en liña, como xa fixo o alumnado de 3º e 4º ESO.

https://bega-elbe2.edu.xunta.es/

Contamos en igualdade

Anticipando o 8M, o alumnado do Cole de Cea recibiu en propia man o convite ofrecido desde o Centro Social de Albarona para asistir en familia á sesión de contacontos do sábado precedente á data sinalada.

Un plan perfecto para a tarde sabatina, non si?

Encontro con Ramón Caride

O pasado mes de febreiro foi un fervedoiro de actividades no noso cole, por mor dos 21 Días co Galego e +. A biblioteca, en colaboración co EDL, foi escenario de varios encontros con escritoras e escritores dos que xa demos conta; pero quedáranos no caixón a visita do autor que lle dá nome á nosa biblioteca: Ramón Caride.

El conversou co alumnado de diferentes niveis sobre algúns dos seus libros: Soños eléctricos, reeditado hai pouco, As músicas viaxeiras e Ramón Cabanillas, do A ao Z. En resumo, unha tríade de volumes variados canto ao xénero e ao público albo, cos que nos agasallou metafórica e literalmente.

Graciñas, Ramón, por volver sempre á túa biblioteca.